తెలంగాణ గీత కార్మికులకు సీఎం రేవంత్ రెడ్డి శుభవార్త చెప్పారు. రాష్ట్రంలో అర్హత ఉన్న ప్రతి గీత కార్మికుడికి పింఛన్ అందించే బాధ్యత తమ ప్రభుత్వం తీసుకుంటుందని వెల్లడించారు. హైదరాబాద్లో సర్దార్ సర్వాయి పాపన్న గౌడ్ విగ్రహాన్ని ఆవిష్కరించిన అనంతరం జరిగిన బహిరంగ సభలో ఆయన మాట్లాడారు.
గీత కార్మికుల ఉపాధిని పరిరక్షించడంతో పాటు వారి ఆదాయాన్ని పెంచేందుకు చర్యలు తీసుకుంటామని సీఎం తెలిపారు. ప్రభుత్వ భూములు, కాలువ గట్ల వద్ద ఈత, తాటి చెట్లను విస్తృతంగా పెంచేందుకు ప్రణాళికలు రూపొందిస్తామని చెప్పారు. గీత కార్మికులు ప్రమాదవశాత్తు మృతి చెందితే వారి కుటుంబాలకు రూ.5 లక్షల పరిహారం అందిస్తున్నామని తెలిపారు.
ఈ సందర్భంగా బీఆర్ఎస్ పాలనపై రేవంత్ రెడ్డి విమర్శలు చేశారు. కులవృత్తుల పేరుతో పథకాలు అమలు చేసిన గత ప్రభుత్వం.. ఆయా వర్గాల పిల్లల విద్య, భవిష్యత్తుపై నిర్లక్ష్యం చేసిందని ఆరోపించారు. కాంగ్రెస్ ప్రభుత్వం బహుజనుల పిల్లలకు మెరుగైన విద్యావకాశాలు కల్పించి వారు డాక్టర్లు, లాయర్లు, ఐఏఎస్ అధికారులుగా ఎదిగేలా ప్రోత్సహిస్తోందన్నారు.
తన ప్రభుత్వ విధానాలను సామాజిక న్యాయంగా అభివర్ణించిన సీఎం.. గత పాలనను కుటుంబ న్యాయంతో పోల్చారు.
ఇక హరీశ్ రావుపై రేవంత్ రెడ్డి చేసిన ఆరోపణలు రాజకీయంగా చర్చనీయాంశంగా మారాయి. రాష్ట్రంలో కరవు రావాలని, రైతులు నష్టపోవాలని ఆయన కర్ణాటక, తమిళనాడుకు వెళ్లి క్షుద్ర పూజలు చేస్తున్నారని సీఎం ఆరోపించారు. ఈ వ్యాఖ్యలపై బీఆర్ఎస్ నుంచి స్పందన రావాల్సి ఉంది.
రానున్న ఎన్నికల్లో కాంగ్రెస్ 117 సీట్లు సాధించి తిరిగి అధికారంలోకి వస్తుందని రేవంత్ రెడ్డి విశ్వాసం వ్యక్తం చేశారు. గౌడ సామాజిక వర్గం కాంగ్రెస్కు అండగా నిలవాలని కోరారు.
