వాతావరణ మార్పుల విధ్వంసం.. సముద్రంలో కలిసిపోయిన ద్వీపం జ్ఞాపకార్థం నీటి అడుగున శిల్పం
వాతావరణ మార్పుల ప్రభావం ప్రపంచవ్యాప్తంగా తీవ్రంగా కనిపిస్తున్న వేళ, ప్రకృతి విధ్వంసానికి ప్రతీకగా నిలిచిన ఓ ద్వీపం కథ ఇప్పుడు మరోసారి ప్రపంచ దృష్టిని ఆకర్షిస్తోంది. పసిఫిక్ మహాసముద్రంలోని సొలొమన్ దీవుల సమూహంలో ఒకప్పుడు ఉన్న కలే (Kale) ద్వీపం పెరుగుతున్న సముద్ర మట్టాల కారణంగా 2016 నాటికి పూర్తిగా సముద్ర గర్భంలో కలిసిపోయింది. ఆ ఘటనకు పదేళ్లు పూర్తైన సందర్భంగా, అదే ప్రాంతంలో నీటి అడుగున ప్రత్యేక శిల్పాన్ని ఏర్పాటు చేశారు.
కోల్పోయిన ద్వీపానికి కళారూపంలో నివాళి
‘ది సొలొమన్ సైరన్’ పేరుతో రూపొందించిన ఈ నీటి అడుగున శిల్పాన్ని బ్రిటిష్ సముద్ర కళాకారుడు జాసన్ డికేర్స్ టేలర్ రూపొందించారు. చెట్టుకు ఆనుకుని నిలబడి ఉన్న మహిళ రూపంలో రూపొందించిన ఈ శిల్పానికి, సొలొమన్ దీవులకు చెందిన వాతావరణ కార్యకర్త గ్లాడిస్ హబు బార్ట్లెట్ ముఖ కవళికలను ఆధారంగా తీసుకున్నారు. ప్రకృతితో మానవుడి అనుబంధం, కోల్పోయిన భూమి జ్ఞాపకాలు, భవిష్యత్తుపై ఆశను ఈ కళాఖండం ప్రతిబింబిస్తుంది.
సముద్ర జీవులకు కొత్త ఆవాసం
ఈ శిల్పాన్ని పర్యావరణానికి హాని కలగకుండా పీహెచ్-న్యూట్రల్ సిమెంట్, బయోచార్ మిశ్రమంతో నిర్మించారు. దీని ప్రత్యేక ఉపరితలం వల్ల పగడాలు, నాచు, స్పాంజ్లు వంటి సముద్ర జీవులు సులభంగా పెరిగే అవకాశం ఉంటుంది. దీంతో కాలక్రమేణా ఇది కృత్రిమ పగడపు దిబ్బగా (ఆర్టిఫిషియల్ రీఫ్) మారి అనేక సముద్ర జీవులకు ఆశ్రయంగా నిలవనుంది. శిల్పంలోని చెట్టు కొమ్మలు సముద్ర పక్షులకు విశ్రాంతి స్థలంగా కూడా ఉపయోగపడతాయి.
వాతావరణ మార్పులకు మౌన సాక్ష్యం
ఒకప్పుడు సుమారు 50 వేల చదరపు మీటర్ల విస్తీర్ణంలో బీచ్లు, అడవులతో కళకళలాడిన కలే ద్వీపం, స్థానిక ఇసబెల్ ప్రావిన్స్ ప్రజలకు సాంస్కృతికంగా ఎంతో ప్రాధాన్యం కలిగిన ప్రదేశం. అయితే సముద్ర మట్టం పెరుగుదలతో ఆ ద్వీపం పూర్తిగా అదృశ్యమైంది. 2008 నుంచి ఇప్పటివరకు సొలొమన్ దీవుల్లో సుమారు 26 వేల మంది ప్రజలు సముద్ర మట్టం పెరగడం వల్ల నిరాశ్రయులైనట్లు నివేదికలు చెబుతున్నాయి.
భవిష్యత్ తరాలకు హెచ్చరిక
ఈ శిల్పంపై 2006, 2016, 2026 సంవత్సరాల్లో నమోదైన సముద్ర మట్టాల వివరాలతో పాటు, 2036, 2046 సంవత్సరాలకు సంబంధించిన అంచనా స్థాయిలను కూడా ప్రత్యేక గుర్తుల రూపంలో చెక్కారు. దీంతో వాతావరణ మార్పుల ప్రభావాన్ని స్పష్టంగా చూపిస్తూ, భవిష్యత్ తరాలకు ఒక హెచ్చరికగా ఈ కళాఖండం నిలుస్తోంది.
ప్రకృతి కోల్పోయిన చోటే కొత్త జీవానికి ఆశ నింపే ఈ వినూత్న ప్రయత్నం ప్రపంచవ్యాప్తంగా పర్యావరణ పరిరక్షణపై చర్చకు దారితీస్తోంది.
