మార్కెట్లో కొనుగోళ్లు చేసినప్పుడు చిల్లర రూపంలో వచ్చే నోట్లలో కొన్నిసార్లు నకిలీ నోట్లు కూడా చెలామణి అవుతున్న ఘటనలు వెలుగుచూస్తున్నాయి. పెద్ద నోట్లతో పాటు రూ.100 నోట్ల నకిలీలు కూడా మార్కెట్లోకి వస్తుండటంతో వినియోగదారులు అప్రమత్తంగా ఉండాలని నిపుణులు సూచిస్తున్నారు. ఈ నేపథ్యంలో అసలు, నకిలీ రూ.100 నోట్లను ఎలా గుర్తించాలో భారతీయ రిజర్వ్ బ్యాంక్ (ఆర్బీఐ) వివరించింది.
ఆర్బీఐ అధికారిక వెబ్సైట్లో భారత కరెన్సీ భద్రతా లక్షణాలపై పూర్తి సమాచారం అందుబాటులో ఉంది. అందులో రూ.100 నోటు ప్రామాణికతను నిర్ధారించడానికి పలు భద్రతా గుర్తులను పేర్కొంది. వీటిని పరిశీలించడం ద్వారా నోటు అసలైనదా, నకిలీదా అనేది సులభంగా గుర్తించవచ్చు.
రూ.100 నోటు దిగువ ఎడమ వైపున ‘100’ అంకెతో కూడిన పారదర్శక భద్రతా గుర్తు (See-through Register) ఉంటుంది. నోటును వెలుతురుకు ఎదురుగా పట్టినప్పుడు ఈ గుర్తు స్పష్టంగా కనిపిస్తుంది. అలాగే నోటుపై ‘100’ విలువ దేవనాగరి లిపిలో కూడా ముద్రించి ఉంటుంది.
నోటు ముందు భాగం మధ్యలో మహాత్మా గాంధీ చిత్రపటం ఉంటుంది. కుడివైపున హామీ ప్రకటన, ఆర్బీఐ గవర్నర్ సంతకం, రిజర్వ్ బ్యాంక్ ఆఫ్ ఇండియా చిహ్నం ముద్రించి ఉంటాయి. ఎగువ ఎడమ వైపున ప్రత్యేక నంబర్ ప్యానెల్, దిగువ కుడి వైపున అశోక స్తంభం చిహ్నం కూడా కనిపిస్తాయి.
ఈ భద్రతా లక్షణాలను జాగ్రత్తగా పరిశీలించడం ద్వారా అసలు, నకిలీ రూ.100 నోట్ల మధ్య తేడాను గుర్తించవచ్చని ఆర్బీఐ సూచిస్తోంది. నగదు లావాదేవీల సమయంలో ప్రతి ఒక్కరూ అప్రమత్తంగా ఉండాలని, అనుమానం కలిగించే నోట్లు ఎదురైతే వెంటనే సంబంధిత అధికారులకు సమాచారం ఇవ్వాలని సూచిస్తోంది.
