విజయనగరం/డెహ్రాడూన్: విజయనగరం జిల్లాకు చెందిన సాఫ్ట్వేర్ ఉద్యోగిని రాధా గాయత్రి ఉత్తరాఖండ్లోని ముస్సోరిలో అనుమానాస్పద పరిస్థితుల్లో మృతి చెందిన ఘటనలో దర్యాప్తు కీలక మలుపు తిరిగింది. మొదట సాధారణ కేసుగా నమోదైన ఈ వ్యవహారం, తల్లిదండ్రుల ఫిర్యాదుతో తొలుత హత్య కేసుగా మారగా, అనంతరం దర్యాప్తులో వచ్చిన ఆధారాల మేరకు భర్త శ్రీచరణ్పై భారతీయ న్యాయ సంహిత (BNS) సెక్షన్ 80(2) కింద వరకట్న వేధింపుల కేసు నమోదు చేసి జైలుకు పంపారు.
పోలీసుల వివరాల ప్రకారం, జూన్ 14న రాధా గాయత్రి ముస్సోరిలో మృతి చెందింది. అంత్యక్రియల అనంతరం ఆమె మరణంపై అనుమానాలు వ్యక్తం చేసిన తల్లిదండ్రులు ముస్సోరి పోలీసులను, అనంతరం రాష్ట్ర డీజీపీని కలిసి సమగ్ర దర్యాప్తు చేయాలని కోరారు. దీంతో పోలీసులు తొలుత హత్య కేసు నమోదు చేసి విచారణ ప్రారంభించారు.
అయితే, పోస్టుమార్టం, ఫోరెన్సిక్ నివేదికల్లో నేరుగా హత్య జరిగినట్లు నిర్ధారించే బలమైన ఆధారాలు లభించకపోవడంతో, పోలీసులు హత్య కేసు స్థానంలో వరకట్న వేధింపుల కేసు నమోదు చేసి శ్రీచరణ్ను అరెస్టు చేశారు.
ఇదిలా ఉండగా, రాధా గాయత్రి తల్లిదండ్రులు తమ కుమార్తెను ముందస్తు ప్రణాళిక ప్రకారమే హత్య చేశారని ఆరోపిస్తున్నారు. పుట్టినరోజు వేడుకల పేరుతో ముస్సోరికి తీసుకెళ్లి హత్య చేశారని వారు ఆరోపిస్తూ, పూర్తి స్థాయి దర్యాప్తు చేపట్టాలని డిమాండ్ చేస్తున్నారు.
మరోవైపు, తమకు సమాచారం ఇవ్వకుండా పోస్టుమార్టం నిర్వహించారని ఆరోపిస్తూ బాధిత కుటుంబం డెహ్రాడూన్ కలెక్టర్ను ఆశ్రయించింది. దీంతో కలెక్టర్ ఆదేశాల మేరకు ముస్సోరి డివిజనల్ మెజిస్ట్రేట్ రాహుల్ ఆనంద్ ప్రత్యేక విచారణ ప్రారంభించారు.
జూన్ 14 నుంచి 16 మధ్య జరిగిన పరిణామాలు, పోస్టుమార్టం ప్రక్రియ నిబంధనల ప్రకారం జరిగిందా లేదా అనే అంశాలపై మెజిస్ట్రేట్ దర్యాప్తు చేస్తున్నారు. ఈ క్రమంలో జూలై 17న విచారణకు హాజరుకావాలని శ్రీచరణ్ తల్లిదండ్రులకు కూడా నోటీసులు జారీ చేశారు.
ప్రస్తుతం పోలీసు దర్యాప్తుతో పాటు మెజిస్ట్రేట్ విచారణ కూడా సమాంతరంగా కొనసాగుతోంది. జూలై 17న జరగనున్న విచారణ అనంతరం ఈ కేసులోని పలు కీలక అంశాలపై మరింత స్పష్టత వచ్చే అవకాశం ఉందని అధికారులు భావిస్తున్నారు.
