రాష్ట్రంలోని ప్రముఖ వైద్య సంస్థ నిమ్స్లో చోటుచేసుకున్నట్లు ఆరోపణలు వస్తున్న అక్రమాలు మరోసారి చర్చనీయాంశంగా మారాయి. ముఖ్యంగా లేబర్ కాంట్రాక్ట్ టెండర్ల కేటాయింపు వ్యవహారం ప్రభుత్వ వర్గాలు, వైద్య వర్గాలు, ఉద్యోగ సంఘాల్లో తీవ్ర చర్చకు దారితీస్తోంది. ఈ నేపథ్యంలో నిమ్స్లో గత కొంతకాలంగా చోటుచేసుకున్న వివిధ పరిపాలనా నిర్ణయాలు, కాంట్రాక్టుల కేటాయింపులు, కొనుగోళ్లపై విజిలెన్స్ విభాగం దృష్టి సారించినట్లు సమాచారం.
విశ్వసనీయ వర్గాల సమాచారం ప్రకారం, నిమ్స్లో గత రెండేళ్లుగా జరిగిన పలు వ్యవహారాలపై ఇప్పటికే విజిలెన్స్ అధికారులు సమాచారం సేకరిస్తున్నారు. ముఖ్యంగా లేబర్ కాంట్రాక్ట్ టెండర్ల ప్రక్రియలో సాంకేతిక అర్హతలు, మార్కుల కేటాయింపు, అర్హతల పరిశీలన, తుది ఆమోద ప్రక్రియలో పాటించిన విధానాలపై ప్రత్యేక దృష్టి పెట్టినట్లు తెలుస్తోంది.
టెండర్ల కేటాయింపుపై అనుమానాలు
తాజాగా నిర్వహించిన లేబర్ కాంట్రాక్ట్ టెండర్లలో అర్హతల పరిశీలన, మార్కుల కేటాయింపుపై అనేక ప్రశ్నలు తలెత్తినట్లు తెలుస్తోంది. గతంలో ఇతర ప్రభుత్వ ఆస్పత్రుల్లో వివాదాలకు కేంద్రబిందువైన ఓ సంస్థకు కాంట్రాక్ట్ కేటాయించడంపై ఆస్పత్రి వర్గాల్లోనే అనుమానాలు వ్యక్తమవుతున్నాయని సమాచారం.
ఈ వ్యవహారంలో కీలక అధికారుల పాత్రపై కూడా చర్చ జరుగుతోంది. టెండర్ ప్రక్రియలో తీసుకున్న నిర్ణయాలు నిబంధనల ప్రకారమే జరిగాయా? లేదా ఎక్కడైనా ప్రాధాన్యతలు మారాయా? అనే కోణాల్లో అధికారులు వివరాలు సేకరిస్తున్నట్లు తెలుస్తోంది.
కీలక ఫైళ్ల పరిశీలన
లేబర్ కాంట్రాక్టులే కాకుండా నూతన వైద్య పరికరాల కొనుగోళ్లు, కాంట్రాక్ట్ నియామకాలు, పదోన్నతులు, వివిధ సేవల ఔట్సోర్సింగ్ ఒప్పందాలకు సంబంధించిన ఫైళ్లను కూడా విజిలెన్స్ బృందం పరిశీలిస్తున్నట్లు సమాచారం.
గత రెండేళ్లలో తీసుకున్న కీలక పరిపాలనా నిర్ణయాలు, వాటికి సంబంధించిన ఫైల్ నోట్లు, కమిటీ సిఫార్సులు, ఆమోద ప్రక్రియలపై అధికారులు దృష్టి పెట్టినట్లు చెబుతున్నారు.
నివేదికలపై ఉత్కంఠ
నిమ్స్కు సంబంధించిన పలు అంశాలపై ఇప్పటికే విచారణ జరిగినప్పటికీ, వాటి నివేదికలు ఇప్పటివరకు బహిర్గతం కాలేదనే చర్చ జరుగుతోంది. విచారణ పూర్తయినా కొన్ని నివేదికలు ఉన్నతస్థాయిలోనే నిలిచిపోయాయనే ప్రచారం కూడా సాగుతోంది.
అయితే దీనిపై అధికారికంగా ఎలాంటి సమాచారం వెలువడలేదు. విజిలెన్స్ విచారణ నిష్పక్షపాతంగా కొనసాగుతోందని, అవసరమైన అన్ని వివరాలు సేకరించిన తర్వాతే తుది నివేదిక సమర్పించే అవకాశం ఉందని సంబంధిత వర్గాలు చెబుతున్నాయి.
వైద్య శాఖ దృష్టి
లేబర్ కాంట్రాక్ట్ టెండర్ల వ్యవహారం మీడియాలో ప్రాధాన్యం పొందిన నేపథ్యంలో రాష్ట్ర వైద్య శాఖ కూడా అప్రమత్తమైనట్లు తెలుస్తోంది. బుధవారం ఈ అంశంపై ఉన్నతాధికారులు ప్రాథమిక సమాచారం సేకరించినట్లు సమాచారం.
ప్రస్తుత యాజమాన్యం మాత్రం టెండర్ ప్రక్రియ నిబంధనల ప్రకారమే జరిగిందని వివరణ ఇచ్చినట్లు తెలుస్తోంది. అయినప్పటికీ ఆరోపణల తీవ్రత దృష్ట్యా సంబంధిత అంశాలపై మరింత లోతైన పరిశీలన కొనసాగుతున్నట్లు సమాచారం.
నిమ్స్ ప్రతిష్ఠకు భంగం కలగకూడదన్న ఆందోళన
దేశంలోనే ప్రముఖ ప్రభుత్వ వైద్య సంస్థగా పేరొందిన నిమ్స్లో వరుసగా అవినీతి ఆరోపణలు వెలుగులోకి రావడం వైద్య వర్గాల్లో ఆందోళన కలిగిస్తోంది. రోగులకు అత్యున్నత వైద్య సేవలు అందించే సంస్థగా ఉన్న నిమ్స్ ప్రతిష్ఠ దెబ్బతినకుండా పారదర్శక విచారణ జరిపి వాస్తవాలను వెలుగులోకి తేవాలని ఉద్యోగ సంఘాలు, ప్రజా సంఘాలు కోరుతున్నాయి.
విజిలెన్స్ విచారణ తుది నివేదికలో ఎలాంటి అంశాలు బయటపడతాయన్నది ప్రస్తుతం ఆసక్తికరంగా మారింది.
