హైదరాబాద్: నగర వాసులకు హైదరాబాద్ ట్రాఫిక్ పోలీసులు కీలక ట్రాఫిక్ అలర్ట్ జారీ చేశారు. కాసు బ్రహ్మానంద రెడ్డి నేషనల్ పార్క్ (KBR National Park) పరిసరాల్లో ఆగస్టు 18 నుంచి వన్-వే ట్రాఫిక్ విధానం అమల్లోకి రానుంది. హెచ్-సిటీ ప్రాజెక్టులో భాగంగా జరుగుతున్న ఫ్లైఓవర్లు, అండర్పాస్ల నిర్మాణ పనుల కారణంగా ట్రాఫిక్ నిర్వహణలో ఈ మార్పులు చేస్తున్నట్లు అధికారులు తెలిపారు.
ప్రస్తుతం నిర్మాణ పనులు కొనసాగుతున్న ప్రాంతాల్లో రోడ్ల వెడల్పు తగ్గడంతో వాహనాల రాకపోకలకు ఇబ్బందులు ఏర్పడుతున్నాయి. దీనికి తోడు కేబీఆర్ పార్క్ చుట్టుపక్కల రోజువారీగా భారీగా వాహనాలు రాకపోకలు సాగిస్తుండటంతో ట్రాఫిక్ రద్దీ పెరుగుతోంది.
ఈ పరిస్థితిని దృష్టిలో ఉంచుకుని వాహనాల రాకపోకలను ఒకే దిశలో క్రమబద్ధీకరించేందుకు వన్-వే విధానాన్ని అమలు చేయాలని ట్రాఫిక్ పోలీసులు నిర్ణయించారు.
ట్రాఫిక్ ప్లాన్కు పైలట్ ట్రయల్స్
కొత్త విధానాన్ని నేరుగా అమలు చేయకుండా ముందుగా పోలీసులు పైలట్ ట్రయల్స్ నిర్వహించారు. ప్రయోగాత్మకంగా ట్రాఫిక్ను మళ్లించి పరిస్థితిని పరిశీలించారు. ట్రయల్స్లో వచ్చిన ఫలితాల ఆధారంగా మార్గాల్లో అవసరమైన మార్పులు చేసి తుది ట్రాఫిక్ ప్లాన్ సిద్ధం చేశారు.
రోడ్లపై కొత్త సైన్ బోర్డులు
వాహనదారులు కొత్త మార్గాలను సులభంగా గుర్తించేలా ప్రధాన కూడళ్లలో ప్రత్యేక ఏర్పాట్లు చేశారు. లేన్ మార్కింగ్, లేన్ ఛేంజర్లు, దిశను సూచించే సైన్ బోర్డులను ఏర్పాటు చేశారు.
ట్రాఫిక్ రద్దీని నియంత్రించేందుకు 24 గంటల పాటు సిబ్బంది విధుల్లో ఉంటారు. వాహనాల రాకపోకలను నిరంతరం పర్యవేక్షిస్తూ అవసరమైనప్పుడు ట్రాఫిక్ మళ్లింపులు చేపట్టనున్నారు.
సీసీటీవీ, డ్రోన్లతో నిఘా
కేబీఆర్ పార్క్ పరిసరాల్లో ట్రాఫిక్ పరిస్థితిపై ఇంటిగ్రేటెడ్ కమాండ్ అండ్ కంట్రోల్ సెంటర్ నుంచి పర్యవేక్షణ కొనసాగుతుంది. సీసీటీవీ కెమెరాల ద్వారా రద్దీని గుర్తించడంతో పాటు అవసరమైన చోట డ్రోన్లను ఉపయోగించనున్నారు.
ట్రాఫిక్ పరిస్థితుల్లో అకస్మాత్తుగా మార్పులు వచ్చినా వెంటనే స్పందించేలా ప్రత్యేక వ్యవస్థను ఏర్పాటు చేశారు. నావిగేషన్ యాప్లలోనూ కొత్త మార్గాలకు అనుగుణంగా అప్డేట్లు చేశారు.
నిర్మాణ పనులు పూర్తయ్యే వరకు వన్వే
హెచ్-సిటీ ప్రాజెక్టు నిర్మాణ పనులు పూర్తయ్యే వరకు ఈ వన్-వే విధానం కొనసాగుతుందని పోలీసులు తెలిపారు. నిర్మాణ పనులు పూర్తయిన తర్వాత ట్రాఫిక్ పరిస్థితిని సమీక్షించి తదుపరి నిర్ణయం తీసుకునే అవకాశం ఉంది.
కేబీఆర్ పార్క్ పరిసరాల్లో ప్రయాణించే వాహనదారులు ముందుగానే తమ ప్రయాణ మార్గాన్ని ప్లాన్ చేసుకోవాలని పోలీసులు సూచించారు. రహదారిపై ఏర్పాటు చేసిన సైన్ బోర్డులు, లేన్ మార్కింగ్లను పాటించాలని కోరారు.
ముఖ్యంగా వన్వే మార్గంలో రాంగ్ రూట్లో ప్రయాణించవద్దని, ట్రాఫిక్ నిబంధనలు ఉల్లంఘించవద్దని అధికారులు స్పష్టం చేశారు. వాహనదారుల సహకారంతోనే కొత్త ట్రాఫిక్ విధానం విజయవంతమవుతుందని పోలీసులు పేర్కొన్నారు.
