ఢిల్లీ-ఎన్సీఆర్ ప్రాంతంలో H1N1 (స్వైన్ ఫ్లూ) కేసులు గణనీయంగా పెరుగుతున్నాయి. తేమతో కూడిన వాతావరణం, మారుతున్న వాతావరణ పరిస్థితుల నేపథ్యంలో శ్వాస సంబంధిత ఇన్ఫెక్షన్లు ఎక్కువవుతున్నాయని వైద్యులు చెబుతున్నారు.
ఈ ఏడాది ఇప్పటివరకు ఢిల్లీలోనే 1,349కి పైగా H1N1 కేసులు నమోదైనట్లు అధికారిక గణాంకాలు వెల్లడిస్తున్నాయి. గత ఏడాది ఇదే సమయానికి 229 కేసులు మాత్రమే నమోదవగా.. ఈసారి కేసుల సంఖ్య దాదాపు ఆరు రెట్లు పెరిగింది.
ఆసుపత్రులకు వస్తున్న బాధితుల్లో జ్వరం, దగ్గు, ఒళ్లు నొప్పులు వంటి సాధారణ ఫ్లూ లక్షణాలతో పాటు శ్వాస తీసుకోవడంలో ఇబ్బందులు కూడా కనిపిస్తున్నాయని వైద్యులు తెలిపారు. కొందరు రోగుల్లో ఆక్సిజన్ స్థాయిలు అకస్మాత్తుగా పడిపోవడం, తీవ్రమైన శ్వాస సమస్యలు తలెత్తుతున్నట్లు వెల్లడించారు.
ఢిల్లీలోని ప్రభుత్వ, ప్రైవేట్ ఆసుపత్రుల్లో పనిచేస్తున్న కొందరు వైద్యులు కూడా H1N1 బారిన పడినట్లు సమాచారం. దీంతో వైరస్ వ్యాప్తిపై ఆందోళన వ్యక్తమవుతోంది.
అత్యవసర హెచ్చరిక సంకేతాలు: శ్వాస తీసుకోవడంలో తీవ్ర ఇబ్బంది, ఛాతీలో తీవ్రమైన నొప్పి, తగ్గకుండా కొనసాగే అధిక జ్వరం, గందరగోళం, పెదవులు లేదా గోర్లు నీలం రంగులోకి మారడం వంటి లక్షణాలు కనిపిస్తే ఆలస్యం చేయకుండా వైద్య సహాయం తీసుకోవాలని నిపుణులు సూచిస్తున్నారు.
వృద్ధులు, ఐదేళ్లలోపు చిన్నారులు, గర్భిణులు, డయాబెటిస్ ఉన్నవారు, దీర్ఘకాలిక గుండె లేదా ఊపిరితిత్తుల వ్యాధులతో బాధపడుతున్నవారు, రోగనిరోధక శక్తి తక్కువగా ఉన్నవారు H1N1 వల్ల తీవ్రమైన అనారోగ్యానికి గురయ్యే ప్రమాదం ఎక్కువగా ఉంటుందని వైద్యులు చెబుతున్నారు.
అధిక ప్రమాదం ఉన్నవారికి, అలాగే మోస్తరు నుంచి తీవ్రమైన లక్షణాలు ఉన్న రోగులకు సకాలంలో వైద్యం అందించడం చాలా కీలకమని నిపుణులు సూచిస్తున్నారు.
Slug: delhi-ncr-h1n1-swine-flu-cases-1349-health-alert
