- తెలంగాణలో వర్షాల జోరు..
- రాబోయే రోజుల్లో భారీ వర్షాలకు అవకాశం
TGN NEWS (హైదరాబాద్): తెలంగాణ రాష్ట్రంలో రాబోయే కొన్ని రోజుల్లో వర్షాల తీవ్రత పెరిగే అవకాశాలు ఉన్నట్లు భారత వాతావరణ శాఖ (IMD) వెల్లడించింది. ప్రస్తుతం నైరుతి రుతుపవనాలు క్రమంగా రాష్ట్రవ్యాప్తంగా విస్తరిస్తుండటంతో పలుచోట్ల ఉరుములు, మెరుపులతో కూడిన తేలికపాటి నుంచి మోస్తరు వర్షాలు కురిసే అవకాశం ఉందని అధికారులు తెలిపారు.
రాష్ట్రంలోని హైదరాబాద్, మేడ్చల్-మల్కాజిగిరి, రంగారెడ్డి సహా పలు జిల్లాలకు ఉరుములు, ఈదురుగాలులతో కూడిన వర్షాల హెచ్చరికలు జారీ చేశారు. గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉందని వాతావరణ శాఖ పేర్కొంది.
జూన్ 22 నుంచి రాష్ట్రంలోని అనేక ప్రాంతాల్లో వర్షాలు మరింత విస్తరించే అవకాశం ఉందని, కొన్ని జిల్లాల్లో భారీ వర్షాలు కురిసే సూచనలు ఉన్నాయని IMD అంచనా వేసింది. దీంతో గత కొన్ని రోజులుగా కొనసాగుతున్న వేడిగాలుల నుంచి ప్రజలకు ఉపశమనం లభించే అవకాశం ఉంది.
అయితే ఉరుములు, మెరుపుల సమయంలో చెట్ల కింద నిలబడకుండా జాగ్రత్తలు తీసుకోవాలని, రైతులు కూడా వాతావరణ సూచనలను అనుసరించాలని అధికారులు సూచించారు.
