హెచ్-1బీ వీసా నిబంధనలను మరింత సులభతరం చేయడంతో పాటు అమెరికాలో ఉన్నత విద్య అభ్యసించాలనుకునే తెలంగాణ విద్యార్థులకు వీసా స్లాట్ల సంఖ్యను పెంచాలని ముఖ్యమంత్రి రేవంత్ రెడ్డి అమెరికా ప్రభుత్వాన్ని కోరారు. ఈ మేరకు బుధవారం న్యూఢిల్లీలో అమెరికా రాయబారి సెర్గియో గోర్‌తో జరిగిన సమావేశంలో పలు కీలక అంశాలను ఆయన ప్రస్తావించారు.
తెలంగాణ నుంచి ప్రతి ఏడాది వేలాది మంది విద్యార్థులు అమెరికాలో ఉన్నత విద్య కోసం వెళ్తున్నారని, అయితే వీసా అపాయింట్‌మెంట్ల కోసం నెలల తరబడి వేచి చూడాల్సిన పరిస్థితులు ఏర్పడుతున్నాయని సీఎం వివరించారు. ఈ నేపథ్యంలో విద్యార్థులకు సకాలంలో వీసా ఇంటర్వ్యూలు జరిగేలా స్లాట్ల సంఖ్యను పెంచాలని, దరఖాస్తు ప్రక్రియను మరింత వేగవంతం చేయాలని విజ్ఞప్తి చేశారు.
అమెరికాలో ఇప్పటికే చదువుకుంటున్న తెలంగాణ విద్యార్థుల భద్రత, సంక్షేమంపై ప్రత్యేక శ్రద్ధ చూపాలని కూడా ఆయన కోరారు. అలాగే హెచ్-1బీ వీసా విధానంలో ఏవైనా మార్పులు చేపట్టే ముందు వాటి గురించి ముందస్తు సమాచారం అందిస్తే, అక్కడ ఉద్యోగాలు చేస్తున్న తెలంగాణ ఐటీ నిపుణులు, ఇతర వృత్తి నిపుణులు తమ భవిష్యత్ ప్రణాళికలను రూపొందించుకునేందుకు ఉపయోగపడుతుందని తెలిపారు.
సమావేశంలో తెలంగాణలో పెట్టుబడులకు ఉన్న విస్తృత అవకాశాలను కూడా రేవంత్ రెడ్డి వివరించారు. ముఖ్యంగా ఐటీ, ఆర్టిఫిషియల్ ఇంటెలిజెన్స్ (ఏఐ), లైఫ్ సైన్సెస్, ఫార్మా, స్టార్టప్‌ల వంటి రంగాల్లో అమెరికా కంపెనీలు పెట్టుబడులు పెట్టాలని, హైదరాబాద్‌ను గ్లోబల్ ఇన్నోవేషన్ హబ్‌గా మరింత అభివృద్ధి చేసేందుకు భాగస్వాములు కావాలని ఆహ్వానించారు.
అంతేకాకుండా అమెరికాలోని ప్రముఖ విశ్వవిద్యాలయాలు తెలంగాణలోని విద్యాసంస్థలతో కలిసి సంయుక్త పరిశోధన, నైపుణ్యాభివృద్ధి కార్యక్రమాలు చేపట్టేలా సహకరించాలని రాయబారిని కోరారు. దీనివల్ల విద్యార్థులకు అంతర్జాతీయ స్థాయి అవకాశాలు మరింత విస్తరిస్తాయని పేర్కొన్నారు.
సుమారు అరగంట పాటు సాగిన ఈ సమావేశంలో ముఖ్యమంత్రి చేసిన ప్రతిపాదనలపై అమెరికా రాయబారి సెర్గియో గోర్ సానుకూలంగా స్పందించినట్లు సమాచారం. అమెరికాలో అత్యంత వేగంగా అభివృద్ధి చెందుతున్న భారతీయ భాషల్లో తెలుగు ఒకటిగా నిలుస్తోందని ఈ సందర్భంగా రేవంత్ రెడ్డి ప్రస్తావించారు.
