టాలీవుడ్ స్టార్ హీరో జూనియర్ ఎన్టీఆర్ షూటింగ్ సందర్భంగా స్వల్పంగా గాయపడినట్లు ఆయన కార్యాలయం అధికారికంగా ప్రకటించింది. సోమవారం సాయంత్రం సినిమా చిత్రీకరణ జరుగుతుండగా ప్రమాదవశాత్తూ ఆయన భుజానికి గాయం కావడంతో వెంటనే ఆస్పత్రికి తరలించి చికిత్స అందించినట్లు వెల్లడించింది.
ఎన్టీఆర్ కార్యాలయం విడుదల చేసిన ప్రకటన ప్రకారం, గాయం తీవ్రంగా లేకపోయినా పూర్తి స్థాయిలో కోలుకునేందుకు కొంతకాలం విశ్రాంతి అవసరమని వైద్యులు సూచించారు. ప్రస్తుతం ఆయనకు ప్రముఖ వైద్యులు డా. జె. మధుసూదన్ రావు, డా. ఆర్. ఏ. పూర్ణచంద్ర తేజస్వి నేతృత్వంలోని వైద్య బృందం చికిత్స అందిస్తోంది.
వైద్యుల సూచన మేరకు జూనియర్ ఎన్టీఆర్ 6 నుంచి 8 వారాల పాటు పూర్తిగా విశ్రాంతి తీసుకోవాలని సూచించారు. ఈ కాలంలో భుజానికి ఒత్తిడి కలిగించే పనులను తగ్గించాలని, అవసరమైన వైద్య పర్యవేక్షణలో ఉండాలని సలహా ఇచ్చినట్లు సమాచారం.
ఈ వార్త వెలుగులోకి రావడంతో అభిమానులు ఆందోళన వ్యక్తం చేస్తున్నారు. అయితే ఎన్టీఆర్ ఆరోగ్య పరిస్థితిపై ఎలాంటి భయాందోళనలు అవసరం లేదని ఆయన కార్యాలయం స్పష్టం చేసింది. ప్రస్తుతం ఆయన ఆరోగ్యం నిలకడగా ఉందని, చికిత్సకు మంచి స్పందన లభిస్తోందని తెలిపింది.
అలాగే ఎన్టీఆర్ ఆరోగ్య పరిస్థితి, కోలుకుంటున్న తీరు గురించి ఎప్పటికప్పుడు అధికారికంగా సమాచారం అందిస్తామని ఆయన టీమ్ వెల్లడించింది. సోషల్ మీడియాలో వస్తున్న పుకార్లను నమ్మవద్దని, అధికారిక ప్రకటనలనే విశ్వసించాలని అభిమానులను కోరింది.
జూనియర్ ఎన్టీఆర్ త్వరగా కోలుకుని తిరిగి షూటింగ్లలో పాల్గొనాలని అభిమానులు, సినీ ప్రముఖులు ఆకాంక్షిస్తున్నారు. ఆయన విశ్రాంతి అనంతరం పెండింగ్లో ఉన్న చిత్రాల షూటింగ్ షెడ్యూళ్లు తిరిగి ప్రారంభమయ్యే అవకాశం ఉందని సినీ వర్గాలు భావిస్తున్నాయి.
